Me gjithë kërkesën e vazhdueshme të opozitës për zgjedhje të parakohshme parlamentare, mësohet se opozita ka shfaqur indikacionet e para për përgatitjet për zgjedhjet lokale në qershor.
Ditën e hënë, Lulzim Basha në mbledhjen e kryesisë së PD-së, ka porositur funksionarët demokratë që të punojnë me listat e zgjedhësve, në mënyrë që secili përgjegjës për zonën zgjedhore të marrë listat e zgjedhësve të qendrës së vet të votimit, dhe të bëjë evidentimin e elektoratit të mundshëm të PD-së. Mësohet se kjo përgatitje është në funksion të zgjedhjeve lokale të 30 qershorit.
Megjithëse data 18 mars ishte afati përfundimtar për opozitën për dorëzimin e listës me emrat e komisionerëve për administrimin e zgjedhjeve lokale, duket se sipas KQZ-së, qëndron edhe një tjetër afat për propozimin e komisionerëve.
Nëse Partia Demokratike dhe Lëvizja Socialiste për Integrim vendosin të marrin pjesë në zgjedhjet lokale, ata kanë edhe një tjetër mundësi, e parashikuar në ligjin zgjedhor, që është edhe afati i fundit për propozimin e komisionerëve, më datën 31 maj. Meqë zgjedhjet lokale do të mbahen në datën 30 qershor, opozita ka afat deri në 31 maj për të propozuar anëtarët e KZAZ-ve.
Pos kësaj, opozita gjatë gjithë kësaj periudhe, ka qenë përballë një presioni nga të gjitha anët për të marrë pjesë në zgjedhjet lokale. Ditë më parë prezenca e OSBE-së bëri thirrje opozitës për të dorëzuar listat e komisionerëve në KQZ, sikundër edhe BE dhe SHBA të cilët kanë kritikuar opozitën dhe prerazi janë kundër bojkotit të zgjedhjeve lokale të 30 qershorit.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
