Ministri i Jashtëm grek Nikos Dendias i konsideroi si të frytshme bisedimet e zhvilluara të mërkurën në Maqedoninë e Veriut, si pjesë e turit në Ballkanin Perëndimor.
“Jam pritur përzemërsisht nga kryeministri i Maqedonisë së Veriut Dimitar Kovaçevski. Bisedime të frytshme për perspektivat e thellimit të bashkëpunimit Greqi-Maqedonia e Veriut, veçanërisht në sektorin ekonomik dhe energjetik, zbatimin e Marrëveshjes së Prespës, rrugën e anëtarësimit të Maqedonisë së Veriut në BE dhe për zhvillimet rajonale dhe ndërkombëtare”, tha Dendias në një postim në Twitter të enjten në mëngjes.
Dendias u takua edhe me ministrin e Jashtëm të Maqedonisë së Veriut, Bujar Osmani, duke i thënë homologut të tij se Greqia "dëshiron konsolidimin e paqes, sigurisë dhe stabilitetit në rajon" dhe se "e vetmja mënyrë për të arritur këto synime është të mbështesim qartë dhe plotësisht perspektivat evropiane. të Ballkanit Perëndimor.”
Zyrtari grek tha se Athina është “absolutisht e bindur se negociatat e anëtarësimit midis Bashkimit Evropian dhe Shqipërisë dhe Maqedonisë së Veriut duhet të fillojnë menjëherë”.
“Ne do të mbështesim perspektivën evropiane të Maqedonisë së Veriut, që është subjekt i kushtëzimit të njohur”, shtoi ai.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
