Një ndër nenet që ka ngjallur më shumë debat në draftin e ri të Kodit Penal është ai që bashkon në një të vetme veprat penale të korrupsionit për zyrtarët e ulët dhe ata të nivelit të lartë, përfshirë të zgjedhurit vendorë.
Kjo, sipas analistëve, sjell në mënyrë të fshehur zbutje të dënimeve për zyrtarët e rangut të lartë dhe dëmton luftën ndaj korrupsionit.
Gazetari Mariglen Kume, i ftuar në “MCN Live”, e cilësoi këtë draft si një hap pas jo vetëm në aspektin penal, por edhe në përmbushjen e kërkesave të Bashkimit Europian për drejtësi efektive dhe integritet në qeverisje.
Me këtë draft kemi ulje të dënimit për korrupsion dhe një përgjeshmëri të paqartë për drejtuesit e nivelit të lartë. BE nuk kërkon lehtësim të dënimeve, përkundrazi, rekomandon dënime më të rënda për zyrtarët e lartë. Ky draft shkon në drejtim të kundërt.
Ky Kod i ri mbulohet me një “makijazh integrimi”, por realisht nuk pasqyron standardet që kërkohen nga BE dhe organizatat ndërkombëtare.
Kur e bashkon një zyrtar të lartë me një punonjës të thjeshtë administrate dhe ul dënimin, nuk vetëm që e barazon padrejtësisht, por edhe shkurtimet e afateve të parashkrimit favorizojnë mosndëshkimin.
Një tjetër pikë kritike që Kume ngre ndaj Kodit të ri Penal është edhe mungesa e progresit në dekriminalizimin e shpifjes, një rekomandim i përsëritur ndër vite nga OSBE, BE dhe organizatat për lirinë e medias.
Ka më shumë se 10 vite që kërkohet dekriminalizimi i shpifjes, por Shqipëria nuk ka ndërmarrë hapa realë. Shpifja mund të trajtohet përmes Kodit Civil, me gjobë, përgënjeshtrim apo masa administrative – pa qenë nevoja ta trajtosh si vepër penale.
Dekriminalizimi nuk do të thotë amnisti për shpifjen, por një mënyrë më e drejtë dhe demokratike për të balancuar lirinë e medias me përgjegjësinë publike të gazetarëve.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
