Njeriu më i pasur i Ukrainës, premton rindërtimin e qytetit të Mariupolit

Njeriu më i pasur në Ukrainë është zotuar të rindërtojë qytetin e Mariupolit sapo të përfundojë lufta.

Rinat Akhmetov e ka parë perandorinë e tij të biznesit të shkatërruar nga tetë vjet luftime në Ukrainën lindore.

“Për ne, lufta shpërtheu në vitin 2014, por ne nuk e humbim besimin te ushtarët tanë”, tha miliarderi ukrainas, i cili shihet si kandidat potencial për të luajtur një rol themelor në rindërtimin e pasluftës të një prej objektivave më të goditur nga rusët, Mariupolit.

Sipas Akhmetov, ushtarët e guximshëm të Ukrainës do të mbrojnë qytetin e Detit Azov, i cili është kthyer thuajse në shkretëtirë pas shtatë javësh bombardime nga trupat ruse.

Kolosi i tij, kompania Metinvest (pjesë e Grupit SCM ), prodhuesi më i madh i çelikut në Ukrainë, ka njoftuar më herët se nuk do të jetë në gjendje të përmbushë marrëveshjet e saj të furnizimit.

Mariupol është një tragjedi globale dhe një shembull global i heroizmit. Për mua Mariupol ishte dhe do të jetë gjithmonë një qytet ukrainas. Unë besoj se ushtarët tanë trima do të mbrojnë qytetin, edhe pse e kuptoj se sa e vështirë është për ta. Ne kemi humbur të gjitha pasuritë tona si në Krime ashtu edhe në territorin e Donbasit të pushtuar përkohësisht. Kemi humbur bizneset tona, por kjo na ka bërë më të fortë dhe më të fortë. Jam i bindur se si kompania më e madhe private në vend, SCM do të luajë një rol kyç në rindërtimin e Ukrainës pas luftës.

Deklarata e Akhmetov u bë për agjencinë e lajmeve Reuters.

Sipas revistës Forbes, vlera e pasurisë së Akhmetov në vitin 2013 arriti në 15.4 miliardë dollarë, ndërsa aktualisht llogaritet 3.9 miliardë dollarë.