Tre vjet pas grabitjes së kryer nga e ashtuquajtura “banda e babagjyshëve”, vihet në pranga një prej protagonistëve. Fatmir Pjetri , 31 vjeç, nga Puka, është vënë në pranga në Holandë, pas një bashkëpunimi mes Interpol Hagës dhe homologëve në Tiranë.
I riu është shpallur në kërkim ndërkombëtar pasi Gjykata e Shkallës së Parë për Krimet e Rënda, në dhjetor të vitit 2014, ka caktuar masën e sigurisë “Arrest në burg” për kryerjen e veprave penale të “Vjedhjes me armë”, “Krijimit të grupit të strukturuar kriminal” dhe “Kryerjes së veprave penale nga grupi i strukturuar kriminal”.
I arrestuari është pjesë e “bandës së babagjyshëve” të dyshuar për grabitjen e qendrës tregtare TEG, katër vite më parë.
Ai akuzohet si pjesë e bandës që vodhi me armë argjendarinë në qendrën tregtare ku katër persona të veshur si babagjyshët e Vitit të Ri sulmuan dyqanin gjatë një orari të mbipopulluar në 24 dhjetor të vitit 2013, në vigjilje të Krishtlindjes.
“Banda e babagjyshëve” dyshohet se është përgjegjëse për nëntë grabitje, shtatë prej të cilave të ndodhura në Shqipëri dhe dy në Strugë. “Banda e babagjyshëve” drejtohej nga Ilir Kupa nga Fushë Kruja, i dënuar më parë në Greqi për vepra të rënda kriminale, i cili është arrestuar dhe aktualisht ndodhet në burg.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
