Nga emisioni “Arnautistan” në MCN TV, zëvendëskryeredaktorja e lajmeve në MCN TV, Klementina Cenkollari tregoi disa prej emrave që çmon në gazetarinë shqiptare.
Adi Krasta për Cenkollarin është nga ata gazetarë që me saktësinë e tij nuk të lë të shkëputesh nga ekrani dhe që për të ka qenë referencë. Pjesë e listës, penën e të cilëve e vlerëson ishin edhe Fatos Lubonja, Alfred Lela. Një tjetër emër që Cenkollari veçoi ishte edhe Ilva Taren si një nga ato gra që mbështesin gratë e tjera.
“Unë do ta nisja me Adi Krastën, nuk e di çfarë ka ai njeri që nuk të lejon të shkëputesh nga ekrani, saktësia e tij, ka qenë një referencë që në krye të herës. Më pëlqejnë shumë shkrimet e Alfred Lelës, e lexoj me kënaqësi. Fatos Lubonjën po ashtu e lexoj dhe çmoj penën e tij. Patjetër kam pasur mundësinë të punoj me një nga gazetaret që unë e çmoj, Ilva Tare dhe që hyn tek ato gra që mbështesin gratë e tjera. Ka qenë një suport shumë i madh për mua dhe dua edhe ta falënderoj. Po ikën dhe mendoj se do të lërë zbrazëti në median shqiptare. Ndërsa për sa u përket folësve të lajmeve, kam pëlqyer gjithmonë Erjona Shehun e cila është larguar por ka spikatur, edhe Mirela Milori për të cilën mendoj se është vlerë për median”, tha Cenkollari.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
