Milo: Enver Hoxha, një figurë e madhe e historisë shqiptare

Ish-ministri i Jashtëm Paskal Milo duke folur mbi librin e tij të fundit në emisionin “Arnautistan” në MCN TV e konsideron Enver Hoxhën një figurë të madhe të historisë shqiptare.

Historiani thekson se figurë të madhe mund të jesh edhe me të këqijat që mund të bësh. 

Milo thotë se u ka cenuar mitin simpatizantëve të Enver Hoxhës, lidhur me faktet që ish-diktatori nisi i pari luftën ndaj Ballit Kombëtar. 

Padyshim që Enver Hoxha edhe për ata që nuk e duan, dhe ata që e duan, është një figurë e madhe e historisë shqiptare, kjo nuk do të thotë se ka vlerësim pozitiv, i madh mund të jesh në të mirat dhe të këqijat që mund të bësh. Duhet të pranojmë që komunizëm sollën risi. E para sepse ishin të rinj dhe s’kishin paragjykime. Të gjitha vajzat partizane ishin të shkolluara. Liri Gega ishte mësuese e shkollës Nëna Mbretëreshë, Nexhmije Hoxha nxënëse. Nuk kam lënë pa përmendur (në libër) edhe meritat në Luftën Nacional Çlirimtare. Në letrat e tetorit 1943 Enver Hoxha mban përgjegjësi për nisjen e luftës ndaj Ballit Kombëtar. Mjaft njerëz që janë simpatizantë të Enver Hoxhës, i ka prekur. Ata s’janë shkëputur nga dogma, dhe unë u kam cenuar mitin. Ata gjykojnë si partizan, unë si historian. Ato tre letra absolutisht asnjëri s’duhet të marrë guximin t’i diskutojë”.

Paskal Milo tha se Enver Hoxha përfitoi dhe u stërvit njëkohësisht nga Miladin Popoviçi.

Enver Hoxha edhe përfitoi nga Miladin Popoviçi, por edhe u stërvit njëkohësisht, dhe iu shtua etja për pushtet politik. De facto filloi të luajë rolin e udhëheqësit. U propozua të zgjidhej Ymer Dishnica, dhe u zgjodh pas tij Enver Hoxha. Rruga e Enver Hoxhës nga shkurt 1942 kur u bë sekretar politik, deri në maj 1943 është një vijë rritëse. Unë mendoj që ambicien për pushtet e ka marrë rrugës. Filloi ta ndjejë veten më të sigurt dhe të çarë rrugën për t’u bërë udhëheqës i Partisë Komuniste. Ka pasur predispozicion të brendshëm për t’u bërë udhëheqës.