Avokati Edmond Petraj tha në edicionin e lajmeve në MCN TV se problemi i gjykatave nuk është dixhitalizimi, sikurse sikurse thotë kryeministri, ndonëse ka për të bërë në komunikimin e brendshëm. Petraj u shpreh se e vetmja gjë që ngelet sa i takon zhvillimit të teknologjisë është sa i përket marrëdhënieve të proceseve gjyqësore. Ai shtoi se harta e re gjyqësore ka krijuar probleme, ka krijuar mbivendosje dhe vonesa të jashtëzakonshme.
Më ka bërë pak përshtypje pjesa e komunikimit të kryeministrit për sa i përket dixhitalizimit. Unë shikoj që gjykata e kanë marrë atë rrugën për dixhitalizimin. Gjykata e Tiranës është pothuaj drejt një modernizimi total. Edhe pse ka shumë për të bërë, por sa i përket komunikimit të brendshëm, nëse do një dokument, etj. etj., ato janë të tëra të digjitalizuara. Të gjitha kanë sistemin e brendshëm, të gjitha kanë sistemin audio, të gjitha kanë mënyrën si mbajnë dosjet, pa hequr mundin dhe përpjekjen e kryesekretarive të gjykatave, që duan më shumë mbështetje nga shteti dhe mund të modernizohen. Problemi është që reformat që mund të bëhen në teknologji, këta i shikojnë më shumë si askes për veten se sa për t’i shërbyer qytetarit. Unë nuk e shikoj si problem këtë. Ka probleme të tjera gjykata. Probleme të tilla duhet të shohë z.kryeministër. Qytetarët që janë palë në proces, ata e kanë një avokat. Duhet të marrë fund prezenca e qytetarëve në seancë, pa prezencën e një avokati. Kemi diskutuar me miq ish-kolegë avokatë, kemi diskutuar për futjen e një pjese të dixhitalizimit të procesit gjyqësor, që mos kemi vonesa nga avokatët. Diskutonim që website i gjykatës të ketë email-in e vet, ose email-in e vet të deklaruar të një avokati, dhe çdo komunikim, çdo dokument të niset me vulë elektronike, që të ketë përparësi dhe ecuri procesi, që të mos ketë vonesa. E vetmja gjë që ngelet sa i takon zhvillimit të teknologjisë është sa i përket marrëdhënieve të proceseve gjyqësore. Nuk shikoj probleme sa i përket dixhitalizimit, sepse të gjitha kanë kontroll të brendshëm. Nuk mund të ketë akses Ministria e Drejtësisë te gjykatat. Nëse një seancë zhvillohet në sallat e gjyqtarëve, kemi problemin e mangësisë së audios, por në sallat e gjykatës, qytetari e shikon kur mbahet procesverbali, sepse e ke përballë. Por ato krijojnë probleme për keqkuptime. Sepse qytetarit në një moment s’i duhet dispozitivi, i duhet audio. Ka një mbingarkesë të jashtëzakonshme ndryshimi i hartës gjyqësore. Sidomos tani kemi edhe Apelin, ku është lënë vetëm Apeli i Tiranës, që nuk punon me kapacitet të plotë. Dosjet që kanë një relator, janë mbivendosur. Llogarit tani që nëse ikën një gjyqtar, 1200 dosje rishqyrtohen. Për mendimin tim harta e re ka krijuar probleme, ka krijuar mbivendosje, vonesa të jashtëzakonshme. Psh. të shikosh një ditë në Gjykatën e Apelit, do shikosh që seanca e orës 09:00 do shtyhet në 13:00, 14:00, 15:00, prandaj ka ardhur koha e asaj formës së re të dixhitalizimit, të pjesës së zhvillimit të teknologjisë”.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
