Lufta në Ukrainë, Borrell: Kina nuk ka kaluar asnjë vijë të kuqe

Kina nuk ka kaluar asnjë vijë të kuqe për sa i përket furnizimit me armë për Rusinë dhe dëshiron të “minimizojë rrezikun e të qenit e lidhur me aktivitetet ushtarake ruse”, tha kryediplomati i BE-së, Josep Borrell, për disa media evropiane.

Borrell konfirmoi gjithashtu të premten (24 mars) se së shpejti do të bëjë një vizitë zyrtare në Kinë për të diskutuar, ndër të tjera, për luftën e Rusisë në Ukrainë, por nuk dha një datë konkrete për udhëtimin.

Pas udhëtimit të presidentit kinez Xi Jinping në Moskë këtë javë, disa liderë evropianë do të udhëtojnë së shpejti në Pekin.

Presidenti i Spanjës, Pedro Sánchez, pritet të jetë atje javën e ardhshme, presidenti francez Emmanuel Macron do të shkojë në Pekin pas dy javësh së bashku me Presidenten e Komisionit Evropian Ursula von der Leyen, ndërsa një ftesë të përhershme ka edhe kryeministrja e Italisë, Giorgia Meloni.

Pala e BE-së, ndërkohë, po përgatitet të finalizojë planet për samitin e ardhshëm BE-Kinë në Pekin, që ka të ngjarë të zhvillohet para verës dhe pas një samiti BE-SHBA, thonë zyrtarët e BE-së.

“Kinezët duan të luajnë një rol diplomatik, ata nuk duan të lidhen plotësisht me veprimet ushtarake të Moskës”, tha Borrell, duke shtuar se Pekini do të kishte interes “të shfaqet si lehtësues i dialogut, jo si ndërmjetës”.

Në shkurt, Kina publikoi një dokument me 12 pika që bën thirrje për bisedime urgjente të paqes dhe një "zgjidhje politike" të luftës, e cila u prit pozitivisht nga Moska, por u pasua me hezitim në Perëndim.

I pyetur për planin e paqes, Borrell përsëriti një vlerësim të mëparshëm se plani ishte "një përmbledhje e pozicionit shumë të njohur të Kinës", por "jo një plan paqeje".

“Putini ka folur për zgjidhje paqësore dhe në të njëjtën kohë vazhdon bombardimet – Kina duhet të përdorë ndikimin e saj në mënyrë që ta bëjë Rusinë të kuptojë se nuk do të shkojë askund”, tha Borrell.

/ Euractive /