Rama: Pjesa më e madhe e qelbit të korrupsionit buron nga prokurimet. Do ta kapërcejmë përmes Inteligjencës Artificiale

Kryeministri Edi Rama tha në episodin e radhës të podcast-it “Flasim” se nga prokurimet buron pjesa më e neveritshme e qelbit të korrupsionit në Shqipëri. Ai theksoi se përmes modelit të inteligjencës artificiale dhe alogritmit, mund të neutralizohet në një masë shumë të madhe ky burim qelbi, duke e bërë procesin transparent dhe të lexueshëm.

Prokurimet janë një problem nga ku burojnë plot pasoja dhe nga ku buron edhe pjesa më e neveritshme e qelbit të korrupsionit. Ne bëjmë mijëra prokurime në vit dhe janë dhjetëra mijëra anëtar komisionesh, njerëz, persona, që duhet të marrin pjesë. Të gjithë këta njerëz jo thjesht duhet të kenë integritet, por duhet të disponojnë dijen e nevojshme ligjore për atë gjë që po bëjnë, duhet të disponojnë dijen teknike. Një pjesë e problematikës është mungesa e kompetencës.

Me modelin të Inteligjencës Artificiale ne mund ta kapërcejmë komplet. Dhe duke e kapërcyer komplet, ne nga njëra anë ne s’kemi më nevojë për këtë konsum të madh energjish njerëzore për të bërë gjithë këto procese dhe nga ana tjetër neutralizojmë në një masë shumë të madhe atë burim qelbi. E kthejmë procesin e prokurimit të  fondeve publike në një proces totalisht transparent dhe të thjeshtë dhe të lexueshëm. Sepse në fund të ditësh ato qindra mijëra ndërveprime që bëjnë njerëzit, ato i bën algoritmi”.