Shkon mbi 16,000 numri i viktimave në Turqi e Siri, ekipet e shpëtimit vijojnë kërkimet

Numri i të vdekurve nga tërmeti shkatërrues që goditi Turqinë dhe Sirinë të hënën është tani të paktën 16,035, sipas autoriteteve.

Në Siri, numri i përgjithshëm i viktimave është të paktën 3,162, duke përfshirë 1,900 në zonat e kontrolluara nga rebelët në veriperëndim, sipas grupit të mbrojtjes civile "Helmetat e Bardha".

Rreth 1,262 vdekje janë regjistruar në pjesët e kontrolluara nga qeveria të vendit, sipas mediave shtetërore siriane.

Në Turqi, numri është rritur në të paktën 12,873, tha të enjten Agjencia e Menaxhimit të Fatkeqësive dhe Emergjencave të Turqisë (AFAD).

Agjencitë e ndihmës kanë paralajmëruar se numri ka të ngjarë të rritet ndjeshëm, veçanërisht në Siri, pasi ekipet e kërkimit dhe shpëtimit kalojnë nëpër rrënojat e mijëra ndërtesave të shembura mes kushteve të motit të ngrirë, përballë rrezikut të pasgoditjeve.

Dhjetëra mijëra njerëz janë raportuar të plagosur në të gjithë rajonin, sipas zyrtarëve. Autoritetet nuk kanë bërë ende një ndarje të detajuar të kombësisë së viktimave.

Turqia është shtëpia e rreth 3.6 milionë refugjatëve sirianë, sipas shifrave të OKB-së, me qindra mijëra sirianë që jetojnë në provincën jugore të Gaziantepit, pranë epiqendrës së tërmetit.

Organizata Botërore e Shëndetësisë tha se po rrit përgjigjen e saj në Siri dhe Turqi sepse sëmundjet tashmë të pranishme do të përforcohen pas tërmetit.

OBSH po dërgon ekipe mjekësore dhe tre fluturime me furnizime mjekësore në rajon. Ushtria amerikane dërgoi dy ekipe civile urbane të kërkim-shpëtimit në Turqi dhe Australi po vendos 72 specialistë të kërkim-shpëtimit në vend.

Ndërkohë, BE njoftoi një konferencë donatorësh për të mbledhur fonde për viktimat.