Koreja e Veriut /Kina thotë se kritikat e Trump janë të 'papërgjegjshme'

Kina thotë se është e papërgjegjshme nga ana e presidentit Trump sugjerimi se nuk ka pasur mjaftueshëm presion mbi Korenë e Veriut në lidhje me programin bërthamor

Trump kishte shkruar në "Twitter" se Kina nuk ishte "duke ndihmuar" për shkak të tensioneve tregtare me SHBA.

Një zëdhënës i ministrisë së jashtme kineze tha se kjo ishte "në kundërshtim me faktet bazë" dhe Kina ishte "e shqetësuar seriozisht".

Të enjten Trump bëri thirrje për ndalimin e udhëtimit të planifikuar të Sekretarit të Shtetit të SHBA-së Mike Pompeo në Korenë e Veriut.

Ai tha se është bërë përparim i pamjaftueshëm në çmontimin e programit bërthamor të Phenianit.

Pas samitit të tij me udhëheqësin e Koresë së Veriut në qershor, Trump tha se vendi nuk ishte më një kërcënim bërthamor.

Por që atëherë ka pasur disa raporte se Koreja nuk po i shkatërron objektet e saj bërthamore.

Një nga paralajmërimet më të fundit erdhi nga zyrtarë amerikanë të paidentifikuar, të cilët i thanë Washington Post se Koreja e Veriut dukej se po ndërtonte raketa të reja balistikale ndërkontinentale.

Edhe agjencia bërthamore e OKB-së (IAEA) ka thënë gjithashtu se Koreja e Veriut po vazhdon me programin e saj bërthamor.

Pekini është aleati i vetëm i rëndësishëm i Phenianit dhe rivali strategjik më i fuqishëm afatgjatë i Uashingtonit në rajon.

Dy pushtetet aktualisht janë të përfshira në një luftë tarifore, pasi Trump u ankua për madhësinë e deficitit tregtar të SHBA me Kinën dhe atë që Uashingtoni e sheh si praktika të tjera të padrejta tregtare.

Secila palë tani ka imponuar 25% tarifa për një total prej 50 miliardë dollarë ndaj mallrave të njëri-tjetrit.

Megjithatë, vetëm tre ditë më parë Z. Trump tha se Kina kishte qenë një "ndihmë e madhe në Korenë e Veriut".

Udhëheqësi i Koresë së Veriut Kim Jong-un ka vizituar disa herë këtë vit udhëheqësin kinez Xi Jinping, duke përfshirë një vizitë pak pas samitit të tij me Z. Trump.