“Ditari i një kinoregjisori”, Keko: Përmblidhen kujtimet e babait tim, e kam rikonceptuar për lexuesit e rinj (VIDEO)

Nuk është nisma ime, unë vazhdova atë dëshirë të tim eti, që pastaj u kthye në një detyrim timin moral për ta përfunduar,. Ai ka mbajtur ditar që në rininë e hershme, ka qenë një prirje e tij dhe procesi krijues më pas e detyroi dhe më shumë për të mbajtur shënime. Pasi u largua nga krijimtaria me kërkesën e miqve të tij gazetarë u fokusua në kthimin e këtyre shënimeve në kujtime dhe filloi t'i botojë në revistat e kohës. Botoi 3-4 kujtime nga filmat, pastaj ndërroi jetë dhe u kthye në nj% detyrim për mua. Mbeti për shumë vite, thjesht në planin që do t’i botoj një ditë derisa në kuadër të 100 vjetorit të lindjes së tij, vendosa t’i botoj.

Ka qenë e vështirë të vendos për botimin e këtij ditari, që sigurisht janë mijëra faqe që unë kam në arkivin e familjes. Jam munduar të mbaj gjërat kryesore nga krijimtaria e tij, por erdhi një moment që duhej ristrukturuar ditari për shkak se pjesa më e madhe e bashkohësve të tij ndërruan jetë dhe isha i detyruar ta rikonceptoja botimin sepse libri do të shkonte në dorën e lexuesve të rinj të cilët nuk e njohin as personazhin në fjalë, as jetën e tij personal dhe familjare, as krijimtarinë e tij.

Nuk është një botim i një ditari klasik, por i një botimi përmbledhës.

Unë kam qenë në dilemën e madhe mes 'Po'-së dhe 'Jo'-së duke marrë për bazë dhe një pyetje që më ka shoqëruar gjithë kohës në tavolinën e punës: A është e përgatitur shoqëria shqiptare politikisht dhe psikologjikisht për ta pranuar kohën e komunizmit me të vërtetat e saj. Prevalonte “jo”-ja. Po erdhi një moment që vendosëm të mos e dëgjojmë veten dhe ta botoj.