Komisioni Irlandez për Mbrojtjen e të Dhënave (DPC) njoftoi një gjobë prej 530 milionë eurosh për kompaninë TikTok, e cila akuzohet për dërgimin ilegal të të dhënave të përdoruesve evropianë në Kinë.
Shuma është gjithashtu më e lartë se raportimet e mediave në fillim të këtij muaji për një gjobë prej 500 milionësh, e treta më e lartë ndonjëherë pas atyre ndaj Amazon 746 milionë dhe Meta-Facebook 1.2 miliardë.
Rregullatori tha se TikTok shkeli rregullat e transparencës midis viteve 2020 dhe 2022 sepse nuk u tregoi përdoruesve se të dhënat personale po transferoheshin në Kinë.
Kompania është gjobitur me 485 milionë euro për transferimet e të dhënave në Kinë dhe 45 milionë euro për mungesën e transparencës në politikën e saj të privatësisë.
TikTok për vite me radhë ka pretenduar se nuk i ruante të dhënat e përdoruesve europianë ose amerikanë në servera në Kinë, por në prill informoi rregullatorin se kishte zbuluar në shkurt se të dhëna të kufizuara të përdoruesve ishin ruajtur në Kinë.
TikTok-ut i është dhënë gjashtë muaj kohë për të sjellë praktikat e përpunimit të të dhënave në përputhje me rregullat e privatësisë të Bashkimit Europian, ose për të pezulluar të gjitha transferimet e të dhënave në vend.
TikTok nuk është dakord me masën dhe paralajmëron apelim të saj.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
