Kryeministri Rama ka ironizuar gjatë fjalës në Kuvend ish-aleatin në qeverisjen e katër viteve të shkuara. Rama u shpreh se LSI është më shumë e gjendur befas në opozitë, duke u ulur prapa kurrizit të PD-së. Kreu i qeverisë paralajmëroi deputetët e LSI-së të bëjnë kujdes me shprehjen “qeveri e vogël, korrupsion i madh”, pasi sipas tij në mënyrë të pandërgjegjshme tregon marrëdhëniet e kësaj partie me pushtetin.
“Nuk më vjen as keq as mirë, ky është një fakt i jetës që një opozitë tjetër më shumë e gjendur befas në këtë opozitë sesa e përgatitur për t’u ulur atje poshtë, pas kurrizit të PD-së pas 8 vjetësh ulur këmbëkryq në tepsinë e pushtetit, u shfaq këtu e mbistresuar nga humbja e vendit të punës.
Siç ju thashë edhe opozitarëve të përbashkët, po jua them edhe ju pas kurrizit të tyre, mos e kërkoni jashtë vetes shkakun e disfatës tuaj dhe mos i merrni shqiptarët për budallenj, që mund t’i tërhiqni nga hunda duke iu bërë predikimin sikur sapo zbritët nga qielli. Dhe kujdes me atë parullën “qeveri e vogël, korrupsion i madh” se tingëllon qamet si një lapsus frojdjan mbi marrëdhëniet që keni ju vetë me pushtetin.
Më vjen shumë mirë që pas kushedi që kur ky kuvend e nisi punën në orar dhe një debat kaq i gjatë dhe i lodhshëm u zhvillua sidoqoftë në një ecuri shembullore mbi binarët e rregullores”, tha ai.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
