Realiteti virtual mund t’i ndihmojë të moshuarit kundër vetmisë

Vetmia përbën një rrezik serioz për shëndetin e të moshuarve dhe faktorë të tillë si lëvizshmëria e kufizuar dhe humbja e dëgjimit, e përkeqësojnë situatën.

Nëse para pandemisë, rreth 1 në 4 të rritur të moshës 50 deri në 80 vjeç raportuan se ndiheshin të izoluar nga të tjerët, gjatë pikut të kufizimeve pandemike (qershor 2020) përqindja u rrit në 56%, ndërsa tani është rreth 34%.

Në Kaliforni, SHBA, disa kompani po arrijnë tek të moshuarit përmes përvojave virtuale, duke menduar për aktivitete rekreative që mund t’i ndihmojnë ata të ndihen më pak të vetëm. Mbështetësit e kësaj praktike të re besojnë se të moshuarit janë kandidatë të shkëlqyer për të përjetuar përfitimet terapeutike dhe sociale të realitetit virtual.

Teknologjia është relativisht intuitive dhe disa studime tregojnë se mund të ndihmojë veçanërisht kundër humbjes së kujtesës, përmirësimin e humorit dhe reduktimin e ndjenjave të vetmisë.

Për shembull, duke filluar nga fillimi i dhjetorit, banorët e Citrus Place, një komunitet pensionistësh i shtresës së mesme në Riverside, Kaliforni, filluan të mblidheshin çdo javë për 30 minuta në realitetin virtual.

Aktiviteti është vullnetar dhe frekuentimi është i mirë, duke pasur parasysh se në ditën e debutimit të projektit dhoma kishte dhjetëra pjesëmarrës, të cilët mbanin me entuziazëm VR, syze të mëdha të pajisura me ekrane që mundësojnë shikimin e realitetit virtual. Programi përfshin një udhëtim me tullumbace me ajër të nxehtë, një safari ose blerje ushqimore.

Kjo është një teknologji që mund ta bëjë çdo video konferencë më argëtuese. Në tregun konkurrues të kujdesit për të moshuarit, një program si ky, i bazuar në realitetin virtual, bëhet një pikë shitjeje.

Sipas firmës së kërkimit të tregut IDC, shitësit e VR dërguan afërsisht 2.9 milion pajisje të realitetit virtual në Shtetet e Bashkuara të Amerikës në 2023, shifër në rënie nga 3.4 milion në 2022.

Në të njëjtën kohë, në qindra objekte amerikane për të moshuarit, realiteti virtual po hapet ndaj një lloji të ri eksperience, që ka të bëjë me yjet e popit të botës virtuale, disa pacientë kanë dëshirën të projektojnë veten në një turne në metaverse muzikore, një botë ku kufijtë midis realitetit fizik dhe virtual bëhen gjithnjë e më të paqartë çdo ditë.

Disa banorë të Citrus Place thanë se përjetonin një ndjenjë të fortë çorientimi në lidhje me ndërveprimet e tyre me të tjerët.

Punonjësit shëndetësorë më pas përpiqen t’i nxjerrin banorët nga “guaska” e tyre dhe t’i shtyjnë që të gjejnë mundësi për t’u lidhur, qoftë edhe bazuar në një këngë të preferuar apo një histori nga e kaluara. Ndërsa i moshuari Echeverria fillimisht ishte i dyshimtë për zbatimin e një regjimi të realitetit virtual, rezultatet kanë qenë befasuese.

Disa njerëz që zakonisht priren të izolohen tani kanë filluar të marrin pjesë në aktivitete kolektive të realitetit virtual. Eksperiencat e disponueshme janë të ndryshme: mund të bëni një udhëtim në Japoni falë funksionit të hartave (të ngjashme me Google Street View), siç dëshironte të bënte edhe pacienti Echeverria, ose një shëtitje në një mal aty pranë, zhytje apo edhe kanotazh në një gondolë në një kanal në Venecia.

Nëse në vitin 2018 studimi i kryer nga AgeLab i Institutit të Teknologjisë në Massachusetts kishte treguar se të moshuarit që përdornin produktet e Rendever (një kompani që punon në sektorin e realitetit virtual dedikuar të moshuarve, me më shumë se 500 organizata partnere) ndiheshin më pak të dëshpëruar dhe të izoluar në krahasim me një grup kontrolli i cili, në vend të kësaj, shikonte TV, hulumtimi i ri i kryer në nëntor 2023 nga studiuesit e Stanford zbulon se rreth gjysma e të moshuarve thanë se përdorimi i realitetit virtual (madje edhe së bashku me kujdestarin e tyre) ishte “shumë ose jashtëzakonisht” të dobishme për marrëdhëniet e tyre.

Anëtari i bordit këshillimor të Mynd Immersive, neuroshkencëtari dhe teknologu mjekësor Walter Greenleaf tha: “Tani për tani, shumë shpesh, të moshuarit thjesht parkohen përpara një televizori. Pra, në një farë mënyre, kjo ka të bëjë me përdorimin e teknologjisë për të adresuar shqetësimet e tyre dhe për t'i argëtuar ato.”