Një zjarr ka përfshirë mesditën e sotme zonën e Ujit të Ftohtë në Vlorë, pranë tunelit, duke rrezikuar edhe një kabinë të ujësjellësit që shërben për furnizimin dhe shpërndarjen e ujit në këtë zonë.
Sipas të dhënave paraprake, flakët dyshohet se kanë nisur në pjesën kodrinore dhe, të favorizuara nga bimësia janë përhapur në drejtim të kabinës së ujësjellësit.
Pas marrjes së njoftimit, forcat zjarrfikëse kanë mbërritur në vendngjarje dhe kanë ndërhyrë për izolimin e vatrës dhe shuarjen e flakëve.
Falë ndërhyrjes së zjarrfikësve, situata po shkon drejt normalizimit, ndërsa zjarri është drejt vënies nën kontroll. Forcat në terren vijojnë punën për të shmangur riaktivizimin e vatrës dhe për të garantuar sigurinë e zonës.
Ende nuk dihen shkaqet e rënies së zjarrit. Përcaktimi i tyre pritet të bëhet pas verifikimeve dhe hetimeve në terren nga strukturat përgjegjëse.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
