Presidenti turk, Recep Tayyip Erdogan, nuk i ka kursyer kritikat ndaj kryeministrit të Kosovës, pasi ky i fundit shkarkoi ministrin e Brendshëm dhe shefin e Inteligjencës, me argumentin se nuk e kishin vënë në dijeni për arrestimin dhe ekstradimin e 6 gylenistëve.
Madje, Erdogan u shpreh se Haradinaj do të japë llogari në lidhje me këto shkarkime.
“Agjencia Turke e Inteligjencës (MIT) me një operacion në Kosovë i kapi dhe i solli në Turqi gjashtë përfaqësues të lartë të FETO’s në Ballkan”, tha Erdogan në një takim me përkrahësit e tij.
“Por kam një pikëllim. Çfarë është ky pikëllim? Kryeministri i Kosovës largoi nga detyra personin në krye të Inteligjencës dhe Ministrin e Brendshëm”, shtoi ai.
“Unë tani pyes kryeministrin e Kosovës: Me udhëzim të kujt more një hap të tillë? Prej kur fillove t’i mbrosh ata që u përpoqën t’i bëjnë grusht shteti Republikës së Turqisë?”.
“Ju z. kryeministër a nuk e dini se Turqia është vendi i dytë menjëherë pas Amerikës që e ka njohur pavarësinë e Republikës së Kosovës. Si mund t’i ushqesh këta njerëz që kanë bërë një tentativë për grusht shteti ndaj Turqisë e cila e mirëpret Kosovën si një vëlla. Do të japësh llogari edhe për këtë”, tha Erdogan.
Presidenti turk i ftoi kosovarët të mos e mbështesin kryeministrin e tyre.
“Vëllezërit e mi kosovarë nuk i japin kredibilitet një kryeministri si ti. Vëllezërit e mi kosovarë, kosovarët që i njoh dhe i di do të kërkojnë llogari prej teje për këtë. Unë e di edhe këtë. Politika nuk zhvillohet me telekomandë. Ata që bëjnë politikë me telekomandë, ata edhe karrierën e përfundojnë me telekomandë”, përfundoi Erdogan.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
