Sharka: Buxheti për bujqësinë i pamjaftueshëm. Fico: Sektor në krizë, duhet mbështetje

Buxheti i bujqësisë për vitin 2027 do të jetë 17.9 miliardë lekë, me një rritje prej 1.1 miliardë lekësh krahasuar me një vit më parë. 

Ekspertët e bujqësisë Eduard Sharka dhe Fatos Fico e cilësojnë si një buxhet të pamjaftueshëm.

Duke folur për “MCN Live”, dy ekspertët u shprehën se sektori është në krizë dhe ka nevojë për mbështetje.

Sharka

Shtesa prej 1.1 miliardësh nuk ndryshon asgjë në raport me vitet e tjera. Shifrat e fundit thonë se në dhjetë vitet e fundit ka pasur rritje negative të sektorit. Është e njëjta qasje në raport me vitet e kaluara, edhe pse problemet anë shtuar, është një rritje e pakonsiderueshme, do të shkojë për kompensimin 10%. 

 

Me rritjen e buxhetit me 1.1 miliardë, problemet në sektorin e bujqësisë nuk zgjidhen. Financimi i bujqësisë është një masë që mund të ndalojë shpopullimin e zonave rurale. Zëri prioritar për bujqësinë, duhet të jetë mbështetja e drejtpërdrejtë e fermerëve.

 

Fico

Është një rritje minimale, pothuajse e njëjta gjë. Rritje minimale krahasuar me nevojat që ka sektori, është shumë pak. Në tre vitet e fundit bujqësia është në rënie reale. Bujqësia është në krizë dhe ka nevojë për mbështetje.

 

Lidhur me fondet që duhen, kemi humbur trenin, treni janë fondet e Bashkimit Europian. Për fat të keq financimet për bujqësinë po bien edhe në vendet e BE, po jepen sa më pak fonde, për t’i dhënë prioritet sektorëve të tjerë. Vendet si puna jonë janë përfitues neto.