Kryeministri Edi Rama ka reaguar ndaj kritikave që disa kryebashkiakë dhe qytetarë kanë shprehur lidhur me propozimin për reformën e re administrativo-territoriale.
Në një postim në rrjetin social X, Rama shkruan se, me përjashtim të rasteve specifike ku janë djegur teserat e Partisë Socialiste, të cilat i cilëson të turpshme, protestat janë normale dhe të mirëpritura.
Më tej kryeministri shprehet se dokumenti i reformës territoriale është në fazën e vet të konsultimit publik prej 60 ditësh dhe sipas tij, gjithësekush ka të drejtë të shprehë mendimin e vet.
Rama nënvizoi gjithashtu se, sipas ligjit, kryetarët e bashkive dhe këshillat bashkiakë duhet të paraqesin me shkrim qëndrimet e tyre, ndërsa u kujtoi se vendimi në fund do të merret nga Parlamenti.
Kritika Rama pati edhe për disa deputetë të Partisë Socialiste, për të cilët tha se kanë bërë "tribunin e vegjëlisë" pa ditur saktësisht se për çfarë po flasin.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
