Vuçiç për “Figaro”: Shqiptarët duan të dominojnë Ballkanin, Kurti ka paralajmëruar marshim më 28 Nëntor në Tiranë

Presidenti i Serbisë, Aleksander Vuçiç, në një intervistë për gazetën franceze “Figaro” është pytur mes tjerash për arritjen e një marrëveshjeje finale me Kosovë, dhe siç shkruan “rts.rs”, Vuçiç është shprehur pesimist rreth mundësisë për arritjen e një marrëveshje finale me Kosovën, dhe gjithashtu ka bërë të ditur se kërkon diçka në këmbim për të njohur pavarësinë e Kosovës.

“Ne në mënyrë konstante po provojmë të gjejmë një kompromis, por Prishtina nuk shqetësohet, sepse ata kujdesen vetëm për interesat e tyre. Ata dëshirojnë që Serbia ta njoh pavarësinë e Kosovës, derisa Serbia nuk merr asgjë në këmbim’, ka thënë Vuçiç.

Ndër të tjera kreu i shtetit serb ka folur edhe per taksën 100 % të cilën ka një vit që qeveria e Kosovës e ka vendosur për produktet me origjinë nga Kosova dhe Bosnja e Hercegovina.

“Kjo nuk është një sjellje e civilizuar. Nëse ata mendojnë se shantazhet e tyre të vazhdueshme mund të japin rezultate, e kanë gabim”, ka thënë Aleksandar Vuçiç.

Gazetarja Figaro u interesua rreth idesë së Shqipërisë së Madhe dhe e pyeti presidentin serb, nëse ekziston akoma, për çka Vuçiç theksoi se shqiptarët kanë ende aspirata të tilla.

"Ata këtë thjeshtë e duan, dhe një gjë të tillë vetëm njerëzit budallenj nuk e shohin. Ndonjëherë ata thonë se do të bashkoheshin nën çatinë e BE-së, dhe nganjëherë thonë ndryshe, por ata kurrë nuk hoqën dorë nga ajo ide. Shikoni Albin Kurti i cili fitoi zgjedhjet. Ndërsa është i ulur, pas tij, nuk ka asnjë flamur të të ashtuquajturës Kosovë, por flamur të Shqipërisë. Dhe të gjithë ambasadorët, përfshirë edhe ata amerikan dhe britanik, u ulën me të pranë flamurit shqiptar, dhe kjo nuk i shqetësoi aspak ata, "tha Vuçiç.

 Vuçiç tha se që nga lufta e vitit 1999 me Serbinë, shqiptarët kanë përdorur imazhin e tyre të mirë, të krijuar nga propaganda e NATO-s, për të arritur qëllimet e tyre.

"Shqiptarët kanë krijuar interesa të reja kombëtare që synojnë mbizotërimin në Ballkan. Kështu, 28 Nëntori është festa kombëtare e Shqipërisë, kurse Albin Kurti e ka paralajmëruar tashmë një marshim të madh drejt Tiranës duke sulmuar Edi Ramën,  pasi Kurti kundërshton politikën e bashkëpunimit në Ballkan të Kryeministrit shqiptar", tha presidenti.