Nga nesër devijon trafiku tek ish-sheshi "Shqiponja", ja si bëhet hyrja dhe dalja nga Tirana

Nga e diela e 4 prillit, do të ndryshojë sërish skema e lëvizjes në ish Sheshin Shqiponja për hyrjen dhe daljen nga qyteti i Tiranës.

Në një reagim për mediat, Autoriteti Rrugor Shqiptar bën me dije se hyrja në Tiranë për përdoruesit që vijnë nga “Rruga e Durrësit” (Casa Italia) do të mundësohet nëpërmjet Tunelit Nr. 3 për drejtimin në rrugën “Teodor Keko” dhe për drejtimin në rrugën “Dritan Hoxha” do të vijohet lëvizja në Tunelin Nr. 4.

Rruga “Dritan Hoxha” do të aksesohet dhe nga rruga “Teodor Keko”.

Dalja nga Tirana do të jetë e pa ndryshuar, e cila do të mundësohet si nga Rruga “Teodor Keko” në drejtim të Durrësit ashtu edhe nga Rruga “Dritan Hoxha” në drejtim të Durrësit.

Për daljen nga rruga “Dritan Hoxha” do të përdoret devijimi në rrugën pranë Bankës “Credins” në afërsi të “Sheshit Shqiponja”.

Për këto punime që po kryhen në rrugë ARRSH kërkon mirëkuptimin e përdoruesve të mjeteve dhe banorëve.