Fatmir Laçej Nënkryetari i Dhomës Kombëtare të Noterëve tha sot nga studio e lajmeve të MCN TV se projektligji për një veting për noterët është diskutuar me ta si në Ministrinë e Drejtësisë dhe në Këshillin e Ministrave.
I pyetur nëse janë dakord lidhur me lidhur me projektligjin e miratuar nga qeveria ditën e djeshme, Laçej tha se kjo është një nismë nga ndërkombëtarët për përmirësimin e ekonomisë shqiptare dhe punës së noterëve, të cilët siç u shpreh ai janë në vijën e parë të frontit pasi pa vulën e noterit nuk mund të lidhen kontrata.
Intervista:
Si jeni njohur me nismën, dhe a është konsultuar paraprakisht Dhoma Kombëtare e Noterëve për këtë nismë?
Laçej: Projektligji për ndryshimet për noterinë është një projektligj që është diskutuar, ne kemi qenë të përfshirë si grup interesi, si në Ministrinë e Drejtësisë dhe në Këshillin e Ministrave.
Ju jeni dakord me atë që ka miratuar qeveria ditën e djeshme?
Laçej: Ne jemi dakord me përmirësimin e punës sepse nisma e Ministrisë së Drejtësisë ka ardhur nga FAF dhe Manival në kuadër të pastrimit të parave. Rekomandimi i tyre ka të bëjë me gjithë ekonominë shqiptare, por në veçanti me noterinë që është në vijën e parë të frontit pasi pa vulën e noterit nuk mund të lidhen kontrata.
Aktualisht sa është numri i noterëve në rang vendi që e ushtrojnë këtë profesion?
Laçej: Numri i noterëve është 450 dhe të gjithë kanë kaluar në sitë. Por rekomandimet e Manival thonë se noterët duhet të jenë të besueshëm.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
