Maxhoranca nuk shkon në mbledhje, Gjekmarkaj: Do jemi këtu për betejë të përditshme

Vijon sërish përplasja ndërmjet opozitës dhe maxhoranës për pjesëmarrjen në komisionet parlamentare.

Edhe ditën e sotme, ashtu siç vepruan dje deputetët e opozitës janë paraqitur fizikisht në komisione, ndërkohë që nga ana tjetër maxhoranca bën thirrje që ato të futen në platformën online dhe të ndiqen online.

Kryetari i Komisionit parlamentar për Edukimin dhe Mjetet e Informimit Publik, deputeti i PD Agron Gjekmarkaj, tha se opozita u paraqit në sallën e komisionit, ndërsa maxhoranca jo, pasi nuk e do përballjen.

Gjatë një prononcimi për mediat ai tha se jemi përpara një situate absurde dhe se Rama nuk do ta ketë të lehtë përballjen me situatën.

Opozita u paraqit në sallën e komisionit të edukimit dhe medias, në përputhje me kushtet dhe ligjet e vendit. U paraqit për të respektuar parlamentarizmin dhe lirinë e fjalës. Gjendemi përpara një situate absurde. Maxhoranca nuk u paraqit, sepse nuk do përballjen me opozitën. Nuk duan të diskutojnë për çështjen e arsimit në Shqipëri, për shkollat që mbyllen, për 2 orë mësim në ditë në shkollat shqiptare. Kjo është një qeveri që ka dalë nga masakra zgjedhore e 25 prillit. Do jemi këtu për betejë të përditshme, betejë me regjimin. Nuk do ta ketë të lehtë Edi Rama përballjen me opozitën e Shqipërisë.

Në fund ai i ka dhënë një mesazh edhe kryetares së Kuvendit Lindita Nikollës, të cilës i tregon shembujt që duhet të ndjekë.

I bëj thirrje kryetares së Parlamentit të mos bëhet certifikuese e dëshirave të Edi Ramës, por të ndjekë shembujt më të mirë të parlamentarizmit shqiptar, Pjetër Arbnorin, Servet Pëllumbin.