Para takimit të nivelit të lartë i paraparë për muajin shtator, lidhur me bisedimet Kosovë-Serbi, i dërguari i Posaçëm i BE-së për dialogun Kosovë-Serbi, Miroslav Lajçak, ka postuar disa fotografi të takimit me përfaqësuesit e dy shteteve në nivelin e ekspertëve, Skender Hyseni dhe Marko Gjuriq, me të cilët është takuar sot.
Diplomati sllovak ka shkruar se para takimit të liderëve është takuar me koordinatorët e Kosovës dhe Serbisë për të përfunduar çështjet që janë diskutuar në takimet e fundit.
“Para takimit të nivelit të lartë mes Beogradit dhe Prishtinës që do të mbahet në fillim të shtatorit, u takova sërish me negociatorët/koordinatorët në Bruksel për të punuar në përfundimin e çështjeve që janë diskutuar gjatë takimeve të fundit”, ka shkruar Lajçak.
Sot në Bruksel janë takuar sërish Kosova dhe Serbia në nivelin e ekspertëve të përfaqësuar nga Skender Hyseni dhe Marko Gjuriq.
Në kryeqytetin evropian do të takohen në fillim të shtatorit Avdullah Hoti dhe Aleksander Vuçiç për të vazhduar dialogun e niveli të lartë.
Kryeministri kosovar dhe presidenti serb do të takohen më 4 shtator edhe në kryeqytetin amerikan me ftesë të Këshilltarit për Siguri Kombëtare të ShBA’së, Robert O’Brien.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
