Moti në fundvit/ Gjoni: Javë e ftohtë me temperatura të ulëta deri në -3°C (VIDEO)

Moti në fundvit pritet të jetë shumë i ftohtë, paralajmëron Instituti i Gjeoshkencave, Energjisë, Ujit dhe Mjedisit (IGJEUM).

Meteorologia Anira Gjoni, e ftuar në emisionin “MCN Live”, bëri të ditur se kjo javë do të shoqërohet me temperatura të ulëta, të cilat do të zbresin deri në -3°C.

Presim që kjo javë të jetë e ftohtë, me temperatura të ulëta që do të na shoqërojnë gjatë gjithë ditëve. 

Ditët e fundit të dhjetorit dhe fillimi i muajit janar do të karakterizohen nga temperatura të ulëta, kryesisht nën zero gradë. 

Vendi ndodhet nën ndikimin e një mase ajrore të ftohtë me origjinë polare, e cila ka sjellë rënie të menjëhershme të temperaturave jo vetëm në Shqipëri, por në të gjithë rajonin e Ballkanit.

Sa i përket vlerave termike për ditën e nesërme, në zonat bregdetare parashikohen temperatura minimale rreth 4°C dhe maksimale deri në 14°C. Në zonat e ulëta, temperaturat minimale do të zbresin në -1°C, ndërsa maksimalet do të arrijnë deri në 10°C. Në zonat malore, minimalet pritet të shkojnë deri në -3°C, ndërsa maksimalet nuk do të kalojnë 6°C.

Të mërkurën parashikohet një tjetër rënie e temperaturave, e cila do të vijojë edhe ditën e enjte. Kjo situatë pritet të zgjasë deri më 2 janar, me temperatura të ulëta dhe reshje të dobëta, të kombinuara me shi dhe dëborë në zonat veriore dhe lindore të vendit.

Ndërkohë, ditën e premte pritet rikthim i reshjeve të shiut në të gjithë territorin.