Tomorri: Mbetjet pa kontroll nga askush prej 3 vjetësh, tani po përpiqen t’ia japin privatit

Pak javë më parë, me vendim qeverie është ngritur Agjencia Kombëtare e Ekonomisë së Mbetjeve. Në studion e emisionit “Të Paekspozuarit”, gazetari Klodian Tomorri tha se kjo agjenci është autoriteti i parë në pas 3 vitesh, të cilit i kalohet përgjegjësia e menaxhimit të mbetjeve. Tomorri tha se po synohet që mbetjet t’i kalohen një landfilli privat për shkak të pamundësisë për t’i dhënë zgjidhje situatës së krijuar.

U paguan paratë për inceneratorin. Nuk u ndërtua, tani mbetjet janë kapicë. Agjencia që administron landfillin nuk pranon më dhera dhe inerte. Tani këta i hedhin nëpër lumen dhe ku të gjejnë vend. Pra paguam 100 e ca milionë euro dhe nuk u zgjidh problemi. Duhet gjetur vend i ri për të hedhur mbetjet. Këta kanë krijuar këtë agjencinë, dhe i kanë dhënë përgjegjësinë e menaxhimit të mbetjeve. Po përflitet lart e poshtë që mund të ketë një licencë të re për një landfill privat në Tiranë dhe kjo agjenci do të lidhë me të marrëveshjen. Ajo që ka ndodhur është e paprecedent. Që nga marsi 2022 mbetjet nuk kanë qenë në fushën e përgjegjësisë së asnjë ministrie. U lanë jetim, nuk kontrolloheshin nga askush. Pasi e lanë tre vjet rresht, është njësoj sikur të lihet energjia, të mos ketë autoritet. Kanë vënë një drejtor, mbi të cilin ka pasur akuza nga opozita.