Orteku që përfshiu mbrëmë një hotel në Abruzzo të Italisë i ka zënë të gjithë klientët në momentet e fundit para se të largoheshin. Ata kishin bërë gati valixhet dhe do të largoheshin, por po prisnin mbërritjen e një borëpastrueseje, e cila do të lironte rrugën.
Por krejt papritur një “lumë” dëbore ka vërshuar nga shpati i malit duke marrë me vete pemët. Nga hoteli “Rigopiano” pak ka mbetur. Një pjesë është shembur, ndërsa pjesa tjetër është e zhytur në dëborë. Ajo çka mbetet në këmbë është një strukturë më mjediset e përbashkëta të mbushura me borë dhe degë pemësh. Asnjë zë dhe asnjë thirrje për ndihmë.
Ekipet e shpëtimit po punojnë për gjetjen e të paktën 30 personave që mendohet se kanë qenë brenda në momentin e tragjedisë. Për shkak të sasisë së madhe të borës së depozituar mbi rrënojat e ndërtesës, qentë që përdoren në raste të tilla e kanë të pamundur të nuhasin dhe të gjejnë nëse ka të mbijetuar.
Rrëfimi i një të mbijetuari 38-vjeçar është rrënqethës. Ai thotë se shpëtoi gjallë pasi sapo kishte dalë për të marrë diçka në makinë, ndërsa gruaja dhe dy fëmijët e tij nuk dihet nëse janë gjallë.
Ndërkohë që orët kalojnë, shpresat për të gjetur të mbijetuar sa vijnë e zbehen. Kjo për shkak të temperaturave të ulëta. Mediat italiane citojnë një prej personave të bllokuar nën rrënoja, i cili ka mundur të dërgojë një mesazh disa orë më parë. “Na ndihmoni, po ngrijmë nga të ftohtët”, i ka shkruar ai familjes së tij.
Orteku dyshohet se u shkaktua nga një seri tërmetesh që goditën dje Italinë Qendrore.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
