Peza reagon pas vendimit të prokurorisë për sekuestrimin e pasurisë: Po hetohem si gazetar dhe jo si deputet (VIDEO)

Deputeti i Partisë Socialiste, Alfred Peza, ka reaguar pas vendimit të Prokurorisë për të sekuestruar pasurinë e tij dhe të bashkëshortes.

Gjatë një deklarate për mediat, Peza theksoi se ky i fundit po hetohet si gazetar dhe jo si politikan.

Deputeti socialist bëri me dije se gjatë kohës që ka ushtruar profesionin e politikanit, përveç rrogës së tij, nuk ka pasur shtim të pasurisë.

“Tashmë edhe nga organi i Prokurorisë është vërtetuar 4-cipërisht se ka 0 shtim të pasurisë time përveç rrogës së deputetit. Kjo duhet kuptuar mirë se  kemi të bëjmë me një fakt . Unë po hetohem si gazetar dhe jo si deputet. Prokuroria nuk ka asnjë problem me deputetin Alfred Peza. Por po heton se si e ka vënë pasurinë një gazetar në Republikën e Shqipërisë. Kjo është e paprecedentë. Këto mund të ishin hetuar fare mirë në dhjetorin e 2012-s,” u shpreh Peza.

Deputeti socialist gjatë fjalës së tij u shpreh se në një vend si Shqipëria, ku rëndom flitet dhe pranohet për persona që prej vitesh ushtrojnë aktivitet publik dhe që zotërojnë pasuri disa herë më të mëdha se unë, prokuroria gjen arsye dhe kohë mbi pasurinë e vënë nga unë, që asnjë ditë të vetme nuk ka pasur post publik dhe nuk ka fituar asnjë tender publik.

"Ju takon atyre ta provojnë se për çfarë më akuzojnë. Fakti që kam një pasuri prej x lekësh nuk është provë. Një fakt i pretenduar nga Prokuroria në lidhje me diferencën e apartamentit të blerë prej 15 vjetësh, është ligjërisht i verifikueshëm", tha Peza.