Kurti takon Vuçiçin në Bruksel, zbardhet axhenda e 14 shtatorit

Të enjten e 14 shtatorit, kryeministri i Kosovës Albin Kurti, dhe presidenti i Serbisë, Aleksandar Vuçiç, do të takohen në Bruksel.

Takimi do të zhvillohet me ndërmjetësimin e përfaqësuesit të Lartë të BE, Josep Borrell, dhe të dërguarit të BE-së për dialogun, Miroslav Lajçak.

BE bën sot me dije se “takimi trepalësh do të mbahet pas takimeve që Borrelli e Lajçaku do të kenë ndaras me liderët e të dyja shteteve”.

Në deklaratë thuhet po ashtu se: “takimet do të nisin në orën 9:00 të mëngjesit, e pas takimeve bilaterale, do të jetë takimi trepalësh”. 

“Takimi do të jetë i fokusuar në zbatimin e Marrëveshjes për rrugën drejt normalizimit, si dhe çështjet aktuale”, thuhet në njoftim.