Dita Ndërkombëtare për t’i dhënë fund mosndëshkimit për krimet kundër gazetarëve (IDEI) është një ditë ndërkombëtare e njohur nga Organizata e Kombeve të Bashkuara (OKB), që shënohet çdo vit më 2 nëntor.
Asambleja e Përgjithshme e Kombeve të Bashkuara miratoi në Sesionin e 68-të (2013) një rezolutë që shpall 2 nëntorin si Ditën Ndërkombëtare për t’i dhënë fund mosndëshkimit të krimeve kundër gazetarëve.
Kjo datë u zgjodh në kujtim të vrasjes së dy gazetarëve francezë në Mali, më 2 nëntor 2013.
Kjo ditë synon të nxjerrë në pah nivelin shqetësues të mosndëshkimit për krimet e kryera ndaj gazetarëve në mbarë botën.
Sipas Observatorit të UNESCO-s, midis viteve 2006 dhe 2024, janë vrarë mbi 1,700 gazetarë në nivel global, ndërsa rreth 90% e këtyre rasteve mbeten të pazgjidhura në gjykata.
Gazetarët luajnë një rol thelbësor në informimin e publikut dhe në ruajtjen e transparencës, prandaj mosndëshkimi për sulmet ndaj tyre ka pasoja të rënda për lirinë e shprehjes, ndërgjegjësimin publik dhe debatin demokratik.
Në këtë ditë, organizatat dhe individët në mbarë botën inkurajohen të flasin publikisht për rastet e pazgjidhura dhe t’u drejtohen zyrtarëve shtetërorë për të kërkuar drejtësi dhe llogaridhënie.
UNESCO zhvillon një fushatë ndërgjegjësimi mbi gjetjet e Raportit Dyvjeçar të Drejtorit të Përgjithshëm të UNESCO-s mbi Sigurinë e Gazetarëve dhe Rrezikun e Mosndëshkimit, i cili evidenton reagimet e shteteve ndaj kërkesave zyrtare për informacion mbi ecurinë e hetimeve dhe gjykimeve të rasteve të vrasjeve të gazetarëve.
Sipas njoftimit zyrtar të Kombeve të Bashkuara, gjatë dekadës së fundit mbi 700 gazetarë janë vrarë duke raportuar lajme dhe informacione për publikun. Vetëm një në dhjetë raste të krimeve kundër punonjësve të medias janë ndëshkuar.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
