Anglia ka prezantuar një plan masash që ka për qëllim rritjen e riciklimit të plastikës. Praktikisht do të rritet çmimi i pijeve në shishe plastike dhe kanaçe alumini, ndërsa shuma e shtuar mbi çmimin aktual do të rimbursohet në momentin që ambalazhi kthehet në dyqan apo supermarket.
Për momentin, kjo iniciativë do të shtrihet vetëm në ambalazhet e të ashtuquajturit “konsum tek”, ndryshe shishet dhe kanaçet me peshë 0,25 litër.
Programe të tilla po studiohen edhe në Skoci dhe Uells. Aktualisht në Britaninë e Madhe konsumohen 13 miliardë shishe plastike në vit, por më shumë se 3 miliardë prej tyre nuk përfundojnë në rrjetin e riciklimit.
Autoritetet thonë se vendosën implementimin e këtyre masave pasi reduktimi i qeseve plastike rezultoi i suksesshëm.
Çmimi i vendosur vitin e shkuar për qeset plastike e reduktoi me 83 % përdorimin e tyre. Por studimet e kryera së fundmi parashikojnë se deri në fund të dhjetëvjeçarit tjetër, plastika në dete do të trefishohet.
Një raport i kohëve të fundit tregon se “ishulli” i plastikës i formuar në oqeanin Paqësor përllogaritet në 80 mijë tonelata, praktikisht në përmasat e Francës, rreth 16 herë më e madhe nga sa mendohej.
Për të kuptuar më mirë këtë fenomen kanë ndihmuar pamjet shokuese të dokumentarit me pjesë në BBC, “Blue Planet II”, i natyralistit David Atttenborough. Në të shfaqen pamjet e kafshëve detare që hanë plastikë apo janë të zhytur në mbeturina të tilla.
Disa vende europiane kanë rezultuar të suksesshme në reduktimin e plastikës përmes masave si taksimi i qeseve dhe shisheve. Në Norvegji, një iniciativë e tillë ka bërë që të riciklohen 94% e shisheve të plastikës. / Përgatiti: Gazmira Sokoli /
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
