Rikthehen tërmetet, Koçi: Janë postgoditje (VIDEO)

Lëkundjet sizmike që prekën vendin mbrëmjen e së dielës dhe mëngjesin e së hënës cilësohen si postgoditje normale të tërmetit të 26 nëntorit nga ana e Istitutit të Gjeoshkencave. Sizmiologu Rexhep Koçi thotë se lëkundjet do të vazhdojë me magnituta të ulta.

Rexhep Koçi, sizmiologu: “Siç e tregojnë dhe ngjarja e natës së kaluar, ajo herë pas here do të gjenerojë disa tërmete, por do të jenë me magnitudë shumë-shumë më të vogël sesa ngjarja kryesore. Edhe kjo 3.6 nuk është se është ndonjë magnitudë shumë e konsiderueshme, por njerëzit duke pasur njëfarë ndjeshmërie nga gjarja kryesore e vlerësojnë këtë si një rrezik, por që nuk ka asnjë lloj rreziku.”

Tërmetet e regjistruara në Greqi, Itali dhe Turqi, sipas Koçit nuk kanë të bëjnë me tërmetet në Shqipëri. Sipas ekspertit sizmiolog, Ballkani është një nga pikat e nxehta të lëvizjeve të pllakave tektonike.

Rexhep Koçi, sizmiologu: “Nuk mund të lidhim që ndodhi një tërmet në Shqipëri me magnitudë të konsiderueshme 6.3 dhe pastaj u pasua në Turqi para ca ditësh me 5.6 dhe ditën e premte me 6.8. Nuk është e lidhur. Kjo tregon që gjithë vendet e Ballkanit janë vende me aktivitet sizmik të lartë, sidomos Turqia zë vendin e parë, pastaj mund të renditet Greqia, pastaj vijmë ne.”

Sipas një raporti të fundit nga Instituti i Gjeoshkencave, magnitutat të tërmetit të 26 nëntorit ishin më të larta seç u raportuan.

Rexhep Koçi, sizmiologu: “Në zonat e epiqendrës së tërmetit është vlerësuar me intensitet 9, ndërsa në periferi pastaj, ku përfshihet dhe Durrësi, është me intensitet 8. Kohëzgjatja e matur pjesërisht me instrumente në Durrës është 15 sekonda, por nuk është se është kaq tërmeti. Kurse i matur në Tiranë është 38 sekonda.”

Dëmet e shkatuara nga tërmeti i nëntorit kapin shumën e 1 miliardë eurove sipas kryeministrit Rama. Ndërkohë që dhjetra familje mbeten ende të strehuara në çadra në pritje të strehimit nga qeveria.