Një tërmet me magnitudë 7.4 goditi brigjet e provincës Sulawesi Jugor të Indonezisë, duke bërë që njerëzit të evakuohen nga shtëpitë dhe ndërtesat.
Tërmeti ndodhi rreth orës 10:30 me orën lokale (03:30 GMT) të martën në detin Flores. Ai preku rajonin e Nusa Tenggara Lindore.
Nuk raportohet ende për të lënduar apo dëme të mëdha, por vendasit thanë se ndjenë lëkundje të mëdha. Paralajmërimet për cunami për zonën u hodhën poshtë.
Raportohet se një spital dhe hotel janë evakuuar. Në Larantuka, një qytet në rajonin e Nusa Tenggara Lindore, banorët thuhet se kanë qenë në "panik" gjatë gjithë natës.
"Të gjithë ishin të shokuar. Ata po iknin nga shtëpitë e tyre. Disa ishin gati të vraponin drejt kodrave," tha Takdir, një banor për BBC Indonezisë.
Megjithatë, ai shtoi se shumica e njerëzve tani ishin "rikthyer në aktivitetet e tyre normale", duke shtuar se nuk kishte asnjë shenjë të një cunami.
Tërmeti vjen vetëm 10 ditë pas shpërthimit të madh vullkanik të malit Semeru në ishullin Java, i cili vrau të paktën 46 njerëz.
Tërmetet janë të zakonshme në Indonezi pasi arkipelagu shtrihet në "Unazën e Zjarrit", një kurbë vullkanesh dhe linjash thyerjesh në Oqeanin Paqësor.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
