Franca mund të hyjë në një krizë politike pasi zgjedhjet parlamentare i japin një goditje Tubimit Kombëtar, por asnjë parti nuk siguron shumicën e nevojshme për formimin e qeverisë së re. Tubimi Kombëtar ka përfunduar në vendin e tretë, pas një aleance të krahut të majtë me centristët e Emmanuel Macron.
Kryeministri Gabriel Attal, i cili është pjesë e aleancës së Macron, thotë se do të japë sot dorëheqjen. Macron-it i kanë mbetur sakaq edhe tre vjet për të përfunduar mandatin e tij presidencial.
Në total e majta fitoi 182 karrige, aleanca centriste e Macronit 168 dhe Tubimi Kombëtar i Marine Le Pen dhe aleatët 143, sipas të dhënave të Ministrisë së Brendshme.
“Sipas logjikës së institucioneve tona, Emmanuel Macron duhet që zyrtarisht sot të ftojë Frontin e Ri Popullor që të nominojë një person për kryeministër”, tha liderja e të Gjelbërve, Marine Tondelier.
Kjo e fundit është një prej eksponenteve të Frontit të Ri Popullor që shihet si kandidate e mundshme për postin në fjalë. Ndërkohë Jean-Luc Melenchon, lideri i partisë “Franca e Panënshtruar”, tha se kryeministri i ri duhet të jetë nga Fronti i Ri Popullor.
Gjatë natës raportohet se ka patur bisedime mes partive të Frontit të ri Popullor, ku bëjnë pjesë Partia Komuniste Franceze, Franca e Panënshtruar nga krahu i majtë, të Gjelbërit dhe Partia Socialiste. Negociatat për formimin e qeverisë së re pritet të nisin më 8 korrik.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
