Victoria Beckham ka ngrënë të njëjtin vakt çdo ditë për 25 vjet

David Beckham ka zbuluar se bashkëshortja e tij, Victoria ka ngrënë të njëjtin ushqim çdo ditë për 25 vjet.

46-vjeçari tha se i pëlqen të ndajë ushqimin e tij, por ish këngëtarja e Spice Girl dëshiron të hajë vetëm peshk të pjekur në skarë dhe perime në avull, duke pranuar se një herë që ajo provoi diçka tjetër ishte "një nga mbrëmjet e tij të preferuara".

Duke diskutuar për zakonet e të ngrënit të gruas së tij në podcastin River Cafe Table 4, ai shpjegoi: “Ndihem mjaft emocional për ushqimin dhe verën, kur ha diçka të mrekullueshme, dua që të gjithë ta provojnë.

Fatkeqësisht, jam i martuar me dikë që ka ngrënë të njëjtën gjë për 25 vitet e fundit.

Që kur e takova, ajo ha vetëm peshk të pjekur në skarë, perime në avull dhe  shumë rrallë mund të ndodh të devijojë nga kjo."

Ai vazhdoi: “E vetmja herë që ajo ndoshta ka ndarë ndonjëherë diçka që ka qenë në pjatën time ishte në fakt kur ajo ishte shtatzënë me Harper dhe ishte gjëja më e mahnitshme. Ishte një nga mbrëmjet e mia të preferuara. Nuk e mbaj mend se çfarë ishte, por e di që ajo nuk e ka ngrënë që atëherë.”

Victoria ka treguar më parë se nuk do të hajë ushqim të gatuar në vaj, gjalpë apo salca dhe nuk ha mish të kuq apo bulmet.

Ajo pranoi se ushqimi i saj komod ishte një copë bukë e thekur me drithëra integrale me kripë dhe në ditëlindjen e saj ajo feston me një tortë të bërë nga fruta.