Prokuroria e Posaçme kundër Korrupsionit dhe Krimit të Organizuar i ka kërkuar Komisionit Qendror të Zgjedhjeve një kopje të formularit të vetëdeklarimit që ka dorëzuar pranë saj kreu i Partisë së Lirisë, Ilir Meta. Me një shkresë që mban datën 23 gusht 2022, SPAK i kërkon KQZ dokumentin në fjalë, i cili do të vihet në funksion të hetimit të nisur ndaj ish-presidentit.
“Për nevojë të hetimit të këtij procedimi penal, kërkojmë kopje të formularit të vetëdeklarimit në zbatim të ligjit “Për garantimin e integritetit të personave që zgjidhen, emërohen ose ushtrojnë funksione publike, të dorëzuar nga ish-deputeti Ilir Meta”, thuhet në kërkesën e SPAK.
MCN mësoi se hetimi që po kryhet ndaj Metës ka të bëjë me kallëzimin e depozituar në qershor në organin e akuzës nga ish-deputeti i PS-së, Halit Valteri.
Në qershor të këtij viti, Valteri kërkoi nisjen e hetimeve për lobim në Shtetet e Bashkuara të Amerikës. Kallëzimi i ish-deputetit socialist e mori shtysën nga një shkrim i botuar në gazetën austriake “Kronen Zeitung”, e cila shkruan se Meta pagoi 700 000 mijë dollarë për lobim përmes një kompanie qipriote guaskë, që të siguronte një foto në ceremoninë e inaugurimit të Presidentit Amerikan Donald Trump.
Përfundimi i mandatit presidencial të Metës, rrjedhimisht edhe i imunitetit që i jepte ky post, i ka hapur rrugë edhe nisjes së hetimit ndaj tij.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
