Aksi kombëtar Librazhd-Prrenjas nuk u hap mesditën e kësaj të hëne, ashtu siç ishte parashikuar.
Gjatë orëve të fundit janë regjistruar shembje dhe rrëshqitje dheu edhe më masive, duke e rënduar ndjeshëm situatën dhe duke dëmtuar punimet për “By Pass-in” provizor që po ndërtohej në zonë.
Gazetarja Entela Duka, në një lidhje direkte me studion e lajmeve në MCVN, bëri me dije se ura në këtë segment ka pësuar degradim të mëtejshëm, duke u bërë përfundimisht e papërdorshme.
Sipas saj, kreu i Autoriteti Rrugor Shqiptar (ARRSH), Ami Kozeli, ka deklaruar se po shqyrtohet mundësia e ndërtimit të rrugëve alternative në zonat rurale përreth.
Kozeli ka sqaruar se janë në vlerësim dy opsione të reja: përdorimi si rrugë alternative i segmentit nga zona e Spathar, i cili mund të aksesohet edhe nga automjetet, si dhe hapja e një rruge sekondare pranë fshatit Dragostunjë.
Ndërkohë, rrëshqitjet e dheut vijojnë të jenë aktive. Po kryhet edhe demontimi i disa shtyllave elektrike të dëmtuara, çka ka lënë disa fshatra pa energji elektrike.
Banorët e Dragostunjës janë detyruar të përdorin rrugë alternative, duke u ngjitur në kodra për të arritur në banesat e tyre.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
