Shkatërrohet banda e trafikut të drogës në Francë, një shqiptar në krye të grupit kriminal

Një bandë kriminale e trafikut të drogës dhe qenieve njerëzore është shkatërruar nga policia franceze.

17 persona, mes të cilëve edhe shqiptarë, përfunduan në prangat e policisë në zonën e Ille-et-Vilaine dhe në Alpes-Maritimes, raportojnë mediat vendore.

Policia franceze nuk ka publikuar identitetin e asnjë prej të arrestuarve, ndërsa të prangosurit janë të moshave nga 19 deri 57 vjeç.

Nga të arrestuarit, është edhe një femër. Në krye të bandës është një shqiptar, 45 vjeç.

Mësohet se shqiptari ishte element i njohur kriminal për policinë, i arrestuar edhe dy herë më parë për trafik të lëndëve narkotike.

Shqiptari u prangos në jug të Rennes. Gjatë kontrolleve u zbulua lëndë narkotike, mjete prerëse, kartëmonedha dhe katër pistoleta.