Drejtoresha e Tatimeve Vlorë kërkoi urdhër mbrojtje, i ati: Djegia e makinës për shkak të detyrës (VIDEO)

Babai i drejtoreshës së Tatimeve në bashkinë e Vlorës, Anjeza Shiko, Muhamet Çota, thotë se makina e së bijës është djegur për shkak të detyrës.

Detajet i sjell korrespodenti i MCN TV, Edi Ruçi i cili ndan edhe deklaratën e babait të zyrtares së bashkisë Vlorë, por edhe detaje të reja.

Ai shprehet se disa ditë para se ti digjej automjeti, zonja Shiko ka kërkuar urdhër mbrojtje për shkak të konflikteve për shkak të detyrës që ka pasur kohëve të fundit. 

Makina është e vajzës, mbrëmë rreth orës 22.15 një komshiu ynë pa tym në garazh. Shkuam dhe pamë që në makinë po dilte tym.

Është e qëllimshme mbi 1000%, për shkak të detyrës së vajzës, vajza punon në bashki. Shteti duhet ta gjejë.

Makina ka qenë e parkuar në brendësi të garazhit të pallatit ku jeton zonja Shiko dhe paraprakisht dyshohet se është spërkatur me benzinë para se t’i vihej flaka.

Policia njoftoi zyrtarisht se mbrëmjen e djeshme, në lagjen “1 Maji”, Vlorë, ka rënë zjarr dhe është djegur një automjet tip “Volkswagen”, në pronësi të shtetases Anjeza Shiko, banuese në Vlorë (funksionare e bashkisë Vlorë).

Shërbimet e policisë kanë shoqëruar në Komisariat, disa shtetas të dyshuar lidhur me ngjarjen.  

Grupi hetimor po punon për zbardhjen e rrethanave të ngjarjes dhe përcaktimin e shkakut të rënies së zjarrit.