Marrëveshja e shekullit! Një tregtar i cili bleu një maskë afrikane për 150 euro dhe ia besoi një shtëpie ankandesh, e cila ia rishiti një blerësi të panjohur për 4.2 milionë euro, do të mund ta mbajë fitimin, pasi shitja është konsideruar e vlefshme.
Çifti tetëdhjetë vjeçar, zoti dhe zonja Fournier, të cilët vendosën të heqin qafe shpejt objektin e gjetur në papafingo, nuk do të mund ta rifitojnë atë dhe as të marrin asnjë dëmshpërblim.
Gjykata në Ales, në jug të Francës, vendosi që ish-pronarët e maskës, një punonjës 88-vjeçar në pension dhe gruaja e tij 81-vjeçare, të cilët i ishin drejtuar një tregtari të dorës së dytë për të hequr qafe mbeturinat e grumbulluara në shtëpinë e tyre, nuk treguan asnjë zell në vlerësimin e vlerës së saktë historike dhe artistike të pronës.
Ata nuk u mashtruan, sipas gjyqtarit francez, por ata ishin të pamatur, dhe për këtë arsye duhet të fajësojnë vetëm veten e tyre.
Neglizhenca dhe pakujdesia e tyre bën që kërkesa për shpalljen e pavlefshme të shitjes nuk mund të pranohet.
Ndër mallrat e gjetura nga papafingo ishte edhe maska prej druri e gdhendur. Shitësi i dorës së dytë e bleu maskën për 150 euro, së bashku me sende të tjera si shtizë, thikë dhe disa vegla muzikore.
Më pas, tregtari kontaktoi një shtëpi ankandi në Montpellier, e cila ekzaminoi objektin dhe rezultoi se ishte një maskë e rrallë Ngil e shekullit të 19-të, e bërë nga njerëzit Fang të Gabonit, një nga rreth 10 që ekzistojnë në botë, ndoshta e blerë rreth vitit 1917 nga Rene-Victor Edward Maurice Fournier, guvernator kolonial francez dhe paraardhës i 88-vjeçarit.
Tregtari mohoi të kishte dijeni se maska ishte kaq e vlefshme. Por shtëpia e ankandeve lëshoi një vlerësim fillestar shumë të nënvlerësuar rreth 300 mijë euro, të cilat tregtari i dorës së dytë ia ofroi çiftit si një demonstrim i mirëbesimit të tij.
Megjithatë, ata nuk pranuan dhe preferuan ta padisin. Më pas ai e tërhoqi ofertën prej 300 mijë eurosh dhe vazhdoi me ankandin. Çmimi përfundimtar 4.2 milionë euro, nga i cili do të zbritet komisioni për shtëpinë e ankandit.
“Kur keni një objekt të tillë në shtëpi, duhet të jeni pak më kurioz përpara se ta jepni”, tha Patricia Pijot, avokatja e tregtarit, duke mohuar që shitësi t’i ketë mashtruar.
Rasti i maskës u ndërlikua më pas kur Republika e Gabonit paraqiti një kallëzim penal për marrjen e mallrave të vjedhura, duke kërkuar anulimin e shitjes dhe riatdhesimin e maskës. Megjithatë, gjykata e shpalli gjithashtu të papranueshme kërkesën e Gabonit.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
