Ka ndërruar jetë në ambientet e burgut Alexey Navalny, një nga udhëheqësit kryesorë të opozitës ruse, raporton shërbimi i lajmeve "Interfax" të premten.
I njohur si kritiku më i zëshëm i Presidentit Vladimir Putin, Navalny po vuante një dënim prej 19 vitesh burg. Veprat penale për të cilat akuzohej Navalny konsiderohen gjerësisht si të motivuara politikisht. "Shkaqet e vdekjes së tij janë duke u përcaktuar", njoftoi agjencia e lajmeve Tass.
Shërbimi i burgut në rrethin Yamalo-Nenets tha se ai "ishte ndjerë keq" ndërsa ishte duke ecur në ambientet e ajrimit. “Ai humbi menjëherë vetëdijen", thuhet në një deklaratë, duke shtuar se një ekip mjekësor emergjent u përpoq pa sukses për ta mbajtur në jetë.
“Mjekët e urgjencës e kanë deklaruar të burgosurin të vdekur. Po përcaktohen shkaqet e vdekjes”, vijon deklarata. Avokati i Navalny, Leonid Solovyov, tha për mediat ruse se për momentin nuk dëshironte ta komentonte rastin.
Navalny u transferua në fund të vitit të kaluar në një koloni penale të Arktikut, e konsideruar si një nga burgjet më të vështira.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
