Drejtorët e Departamenteve të Policisë Kriminale dhe për Kufirin dhe Migracionin zhvilluan një vizitë zyrtare në Qendrën e Analizës dhe Operacioneve Detare (MAOC) dhe në Ministrinë e Drejtësisë të Portugalisë, me qëllim forcimin e bashkëpunimit ndërkombëtar kundër krimit të organizuar.
Vizita u realizua me ftesë të përfaqësuesve të Operacioneve Ndërkombëtare të Home Office (HOIO) dhe u fokusua në rritjen e bashkëpunimit operacional dhe shkëmbimin e inteligjencës në luftën kundër trafiqeve ndërkombëtare.
Delegacioni shqiptar, i kryesuar nga Drejtori i Departamentit të Policisë Kriminale, Neritan Nallbati, dhe Drejtori i Departamentit për Kufirin dhe Migracionin, Sajmir Muçaj, u prit nga Drejtori i Bordit të MAOC, Artur Vas.
Gjatë vizitës, ata u njohën nga afër me strukturën dhe funksionimin operativ të kësaj qendre shumëkombëshe, e cila përfshin 8 shtete europiane dhe luan rol kyç në koordinimin e operacioneve detare dhe ajrore kundër krimit të organizuar.
Në vijim, delegacioni zhvilloi takime edhe në Ministrinë e Drejtësisë të Portugalisë, me drejtues të Policisë Gjyqësore portugeze. Palët ranë dakord për nisjen e bashkëpunimit multilateral ndërmjet Policisë së Shtetit Shqiptar dhe MAOC, si dhe për forcimin e bashkëpunimit dypalësh me Policinë Gjyqësore të Portugalisë.
Vizita konsiderohet një hap i rëndësishëm në rritjen e sigurisë detare dhe intensifikimin e përpjekjeve të përbashkëta kundër trafikimit ndërkombëtar të lëndëve narkotike.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
