Reperi amerikan Eminem ka ndërmarrë veprime ligjore kundër kompanisë australiane të veshjeve të plazhit, “Swim Shady”, duke thënë se emri i saj është shumë i ngjashëm me pseudonimin e tij të markës tregtare të repit “Slim Shady”.
Në shtator, Eminem, emri i vërtetë i të cilit është Marshall B Mathers III, paraqiti një peticion në “Zyrën e Patentave dhe Markave Tregtare të SHBA-së”, duke kërkuar që ajo të anulojë një markë tregtare që i ishte dhënë kompanisë. Ligji amerikan kërkon që kompania t'i përgjigjet peticionit deri javën e ardhshme.
Avokatët e reperit 53-vjeçar akuzuan markën me seli në Sydney për krijimin e një "shoqërimi të rremë" me Eminemin.
Emri i kompanisë u regjistrua në shtator 2023, sipas rregullatorit të biznesit të Australisë, fillimisht duke u lançuar nën emrin “Slim Shade”. Zyrtarisht u lançua në vitin 2024.
Këtë vit, marka paraqiti një regjistrim marke tregtare në SHBA me emrin "Swim Shady", i cili u miratua. Pak më vonë, ekipi i Eminem paraqiti një peticion për anulimin e markës tregtare.
Eminem gjithashtu ka paraqitur një kundërshtim ndaj emrit të markës në Australi.
"Swim Shady është një kompani australiane me origjinë nga baza që lindi nga dëshira për të prodhuar syze dielli elegante dhe efektive dhe artikuj të tjerë për t'u mbrojtur nga dielli i ashpër australian", tha kompania, duke shtuar se nuk mund të komentonte më tej për shkak të çështjes ligjore në vazhdim.
Dokumentet e gjykatës tregojnë se Eminem e regjistroi emrin “Slim Shady” si markë tregtare në SHBA në vitin 1999 me publikimin e albumit me të njëjtin emër. Megjithatë, ai paraqiti një kërkesë për markë tregtare për emrin “Slim Shady” në Australi vetëm në janar 2025.
Eminem u bë i famshëm në vitin 2000 me publikimin e këngës së tij hit “The Real Slim Shady”, e cila i fitoi atij një çmim Grammy për performancën më të mirë solo në rep.
Avokatët e tij thanë se emri është bërë "i veçantë dhe i famshëm" dhe i lidhur ekskluzivisht me karrierën e tij në rep.
Firma e specializuar ligjore e pronësisë intelektuale në Sidnei, “Meyer West IP”, është listuar si përfaqësuese ligjore e “Swim Shady”.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
