SHBA duket se është e gatshme t'i japë Arabisë Saudite pak më shumë kohë për të përfunduar hetimet ndaj akuzave e Turqisë se agjentët sauditë vranë një gazetar me banim në SHBA brenda konsullatës së Riadit në Stamboll.
Sekretari i Shtetit Mike Pompeo, pas takimit me udhëheqësit sauditë dhe turq këtë javë, informoi të enjten Presidentin Donald Trump në Shtëpinë e Bardhë, duke i kërkuar atij t'i japë Arabisë Saudite edhe disa ditë të tjera për të përfunduar hetimin rreth zhdukjes së gazetarit Jamal Khashoggi.
Shefi i diplomacisë amerikane, tha se pasi SHBA të shqyrtojnë raportin saudit, “Shtetet e Bashkuara do të përcaktojnë se cila mund të jetë përgjigja e duhur".
Ai tha se janë përhapur shumë variante rreth asaj se çfarë mund t’i ketë ndodhur Khashoggit. Por ai nuk pranoi të shprehë hamendje mbi rezultatet e hetimeve në Arabinë Saudite dhe Turqi. Kryediplomati i SHBA tha se beson se nga hetimet do të dalë "një panoramë e plotë".
Pompeo sqaroi se i kishte thënë mbretit saudit Salman dhe udhëheqësit de facto të vendit, princit të kurorës Mohammed bin Salman, se SHBA e merr "shumë seriozisht" çështjen Khashoggi por gjithashtu vuri në dukje se SHBA dhe Arabia Saudite kanë një "aleancë strategjike" prej shumë dekadash.
Takimi i zotit Pompeo me Presidentin Trump vjen pasi hetuesit turq kryen një kërkim të ri në konsullatë, i dyti brneda një jave. Ata përfunduan gjithashtu një kërkim prej nëntë orësh në rezidencën aty pranë të konsullit saudit në Stamboll, i cili u kthye papritmas në Riad të martën.
Arabia Saudite ka mohuar se ka dijeni për zhdukjen e Khashoggit.
Pas Riadit, zoti Pompeo shkoi në Ankara, për t'u takuar me Presidentin Rexhep Tajip Erdogan dhe Ministrin e Jashtëm Mevlut Çavusoglu.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
