Kryetari i Partisë Demokratike, Lulzim Basha të premten gjatë një takimi me të rinj dhe intelektualë prezantoi platformën për reformimin e sistemit zgjedhor. Basha tha se kjo reformë radikale synon qeverinë kalimtare, si garant për votën e lirë. Kryedemokrati u shpreh se sistemi zgjedhor nuk është vetëm një vendim i partive politike, por edhe i popullit.
Ai deklaroi, mes të tjerash, deri kur Shqipëria të bëhet anëtare e BE-së, 100 ditë para zgjedhjeve, shqiptarët të kenë një qeveri kujdestare për të menaxhuar procesin, për të garantuar zbatimin e ligjeve dhe votën e lirë.
“Shitblerja e votës shuan zërin e qytetarëve dhe i jep kontrollin një grushti politikanësh, biznesmenësh dhe kriminelësh të fuqishëm. Reforma zgjedhore është hapi i parë për t’i dhënë fund korrupsionit, për një ekonomi më të fortë dhe anëtarësim në BE”, tha Basha.
Kreu i PD-së, deklaroi se sistemi zgjedhor duhet të garantojë kontrollin dhe balancimin e pushteteve, në mënyrë që pushteti të mos përqendrohet në një dorë.
Ai propozon ngritjen e një Senati për llogaridhënien e qeverisë, ku 40 anëtarët e këtij Senati të zgjidhen bashkë me 100 anëtarët e Parlamentit.
“Parlamenti me dy dhoma nuk rrit koston për qytetarët, por ndryshon mundësinë për t’u shërbyer njerëzve në mënyrë pozitive. Arroganca dhe presioni i qeverisë nuk do të funksionojnë më për një parlament të fuqizuar me dy dhoma. Qeveria duhet të kërkojë konsensus me të dy dhomat", u shpreh Basha.
Basha solli edhe shembujt e vendeve më të zhvilluara me Senat SHBA, Mbretëria e Bashkuar, Franca dhe Italia vende me parlament me dy dhoma.
Pesë ndryshime, sipas kreut të PD për të realizuar këtë reformë janë:
"Ndryshimi i parë, kontroll të plotë kushtetues dhe ligjor mbi kandidatët, që të jenë të pastër dhe me integritet. Kontrolli të bëhet nga një organizëm i pavarur.
Ndryshimi i dytë, tolerancë zero për ata që përfshihen në shitblerjen e votës. Edi Rama i ka mbrojtur dhe promovuar, ne do t’i çojmë në burg.
Ndryshimi i tretë, financimi i partive, që ato të mos varen nga biznese dhe individë të pasur. Politikanët të varen nga njerëzit dhe të kontrollohen prej tyre. Kush financon partitë, përjashtohet nga marrja e tenderave publikë pas zgjedhjeve, që të mos përfitojnë për shkak të donacioneve për partitë.
Ndryshimi i katërt, identifikim, votim dhe numërim elektronik. Do t’i bëjë zgjedhjet më të ndershme dhe rezultatin më të shpejtë.
Ndryshimi i pestë, sistemi. Ne duam një sistem të thjeshtë, të qartë, përfaqësues. Një sistem, që i kërkon llogari qeverisë."
Basha deklaroi se mënyra e zhvillimit dhe rezultati i zgjedhjeve ndikon direkt në jetën tonë. Me një rezultat të ndershëm tha ai përfitojnë të gjithë shqiptarët.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
