Pas dështimit të misionit të ndërkombëtarëve për të zgjidhur krizën politike në Shqipërisë, zgjidhja duket se do të vijë nga brenda kufirit.
Të paktën kjo është përpjekja e radhës nga kreu i Kuvendit të Shqipërisë Ilir Meta, i cili pasditen e kësaj të mërkure ka thirrur në një takim të gjithë drejtuesit e partive parlamentare. Takimi mësohet se do të zhvillohet në orën 19:00 në kryesinë e Kuvendit.
Ky vendim vjen pas bisedimeve intensive që kryeparlamentari Meta, njëherësh kryetar i Lëvizjes Socialiste për Integrim, pati gjatë ditës së sotme me ambasadorët e SHBA,BE dhe OSBE në kryesinë e Kuvendit.
Kujtojmë se nënkryetari i Partive Popullore Evropiane David McAllister dhe eurodeputeti Knut Fleckenstein, të mandatuar nga BE për zgjidhjen e krizës, u larguan nga Shqipëria pa arritur të ulin në negociata kryeministrin Edi Rama dhe liderin e opozitës Lulzim Basha, edhe pse dje patën bisedime të veçanta me liderët politikë përreth 5 orë.
Opozita e bashkuar prej 67 ditësh ndodhet në protestë dhe ka deklaruar se do të bojkotojë zgjedhjet e përgjithshme parlamentare të 18 qershorit 2017, nëse nuk plotësohet kërkesa e tyre për krijimin e një qeverie teknike pa Ramën kryeministër.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
