Zgjerimi me 12 milje në det, ligji i parë që shkon për miratim në Parlamentin grek (VIDEO)

Me një lëvizje të natyrës praktike dhe simbolike, qeveria po përgatitet, siç informohet "To Vima", për të çuar në Parlament si projektligjin e parë që do të votohet për këtë vit zgjerimin e ujërave territoriale nga 6 në 12  milje në detin Jon (nga pika më veriore e arqipelagut të ishujve në detin Jon deri në Kepin Tenaro në Peloponez).

Kjo do të thotë që projektligji përkatës do të jetë i pari që do të prezantohet për diskutim dhe votim menjëherë pas rifillimit të punës së Parlamentit në 11 janar. Mbetet për t’u parë nëse për shqyrtimin dhe votimin e këtij projektligji do të ndiqet procedura urgjente apo ajo normale.

Votimi i këtij projektligji në Parlament bazohet në nenin 27 të Kushtetutës, i cili parashikon se "asnjë ndryshim i kufijve nuk mund të bëhet pa ligj". Zgjerimi i ujërave territoriale do të shoqërohet edhe me përafrimin e hapësirës ajrore në 12 milje.

Ristrukturimi i ekuilibrave dhe përgatitja elektorale

Dekreti presidencial, sipas të cilit mbyllen gjithsej 39 gjire dhe limane në Greqinë Perëndimore dhe ishujt e Jonit, në përputhje me nenin 10 të Konventës së Kombeve të Bashkuara për Ligjin e Detit (UNCLOS), u firmos në 25 dhjetor.

Këto janë të ashtuquajturat "gjire juridike", ku shembujt më tipikë janë Gjiri i Korfuzit, Gjiri i Ambrakisë dhe Gjiri Mesinik. Për më tepër, vijat bazë u vizatuan në 10 pika në përputhje me nenin 7 të UNCLOS.

Miratimi i shpejtë i ligjit mbi shtrirjen e ujërave territoriale vjen në një kohë kur ka një debat të gjerë nëse dhe kur do të rinisin kontaktet midis Athinës dhe Ankarasë për kërkimet në Egje. Pala greke ka deklaruar gatishmërinë e saj për të marrë pjesë në këto bisedime të ndalura që në vitin 2016. Kohët e fundit, është vënë re një ashpërsim i ri i retorikës nga zyrtarët e qeverisë turke dhe që nga ky moment, nuk është caktuar asnjë datë për rinisjen e bisedimeve.