Lajçaku dhe Escobari vizitojnë javës tjetër Kosovën

I dërguari i posaçëm i BE për dialogun mes Kosovës dhe Serbisë, Miroslav Lajçak dhe i dërguari i posaçëm i SHBA-së për Ballkanin Gabriel Escobar pritet të vizitojnë Prishtinën dhe Beogradin javën që vjen. Radio Evropa e Lirë duke cituar burimet diplomatike në Bruksel për Radion Evropa e Lirë bën me dije se vizitat do të kryhen të hënën dhe të martën.

Sipas burimeve, vizita e tyre do të ketë dy qëllime kryesore:

"Qëllimi i parë është gjetja e zgjidhjes për të dalë nga situata aktuale e cila rrezikon të dëmtojë gjithë atë që BE-ja e konsideron si sukses në dialog. Pra, fokusi së pari do të jetë në uljen e tensioneve dhe vazhdimi i përpjekjeve në bazë të asaj që është propozuar pas takimit në Moldavi.

Në Moldavi, më 1 qershor, udhëheqësit e Gjermanisë dhe Francës, Olaf Scholz dhe Emmanuel Macron u kanë kërkuar Kosovës dhe Serbisë të mbajnë zgjedhje të reja në komunat në veri të Kosovës, gjatë takimit të tyre me presidentët e të dy vendeve, Vjosa Osmanin dhe Aleksandar Vuçiçin.

Ndërsa qëllimi i dytë do të jetë vazhdimi i punës në sekuencimin e hapave për të zbatuar marrëveshjen e arritur në Bruksel dhe aneksin për të cilin palët ishin pajtuar në Ohër.

Bashkimi Evropian e kishte quajtur arritjen e marrëveshjes për rrugën drejt normalizimit të raporteve si një dalje nga faza e menaxhimit në krizave në një fazë të normalizimit”.