Vendimi i “Kushtetueses”/ Kalemaj: Ramës s’i interesonte ta kishte në ring, Meta do jetë CEO i polit të tretë (VIDEO)

Politologu Ilir Kalemaj foli mbi vendimin e Gjykatës Kushtetuese për rrëzimin e vendimit të Kuvendit, duke mos shkarkuar kësisoj presidentin Ilir Meta. Duke folur për MCN Live ai tha se vendimi ishte i balancuar, duke shtuar se Rama s’kishte interes ta shkarkonte Metën dhe ta kthente në ring.

Ishte një vendim i balancuar. I jepte të drejtë edhe Kuvendit për procedurat, por i jepte të drejtë në fund të ditës Ilir Metës. Shkelje të rënda nuk e kemi të definuar në Kushtetutë, dhe nuk është shkarkuar as në Evropë një president për deklaratat e tij. Ne nuk mund të shpikim legjislacion. Asnjë gjyqtar s’mund të bënte gafë juridike vetëm për të kënaqur orekse politike.  Ajo që z.Balla tha populli e konsideron të shkarkuar, është përgjegjësi e madhe të flasësh në emër të popullit. Vetëm në shoqëritë totalitare është masë homogjene populli. Fakti që Rama e anashkaloi dhe dha një koment të thatë tregon se vetë ai s’ka pasur interes për shkarkimin e Metës. Për t’u kthyer në ringun e politikës, për t’u kthyer në një faktor?! Por a është ky testi i vërtetë i drejtësisë së pakapur, apo është çështja e inceneratorëve. A kemi një pakt të heshtur që u miratua emri i guvernatorit dhe këto dekretet e fundit”, u shpreh ai.

Kalemaj tha se mes mazhorancës dhe PD-së ka bashkërendim të axhendave, që s’duhet interpretuar si bashkëqeverisje. I pyetur mbi të ardhmen e politikës, Kalemaj tha se Meta mund të jetë një CEO në polin e tretë që po krijohet në aleancë me fraksionin e Berishës.

Nga ky moment e tutje, LSI-ja i rri ngushtë edhe kostumit të Metës, por edhe politikës shqiptare. E ndërlidhur me fraksionin e Berishës, të çon drejt polit të tretë. Nëse Berisha do jetë president i grupit, CEO do të jetë Ilir Meta. Sa kjo opozitë do bashkërendojë axhendat me Lulzim Bashën, kjo ngelet për t’u parë. LSI dhe Shtëpia e Lirisë kanë peshë elektorale të qenësishme”, tha ai.